1Ti 6 | BEF | STEP | Kele kele pana'i lolo hite foya lite minelata nehana enali ya'ma kaba bona'animu agoya hu emite kehelite minalabe. Yamofihi kaba hite ya nehinogo bona'i luga'amagi Hu'mamofihi gi'a li sibina hite to mono kaga enelepise'nati le'mo laba hi lalabe.

1 Timothy 6

1 Kele kele pana'i lolo hite foya lite minelata nehana enali ya'ma kaba bona'animu agoya hu emite kehelite minalabe. Yamofihi kaba hite ya nehinogo bona'i luga'amagi Hu'mamofihi gi'a li sibina hite to mono kaga enelepise'nati le'mo laba hi lalabe. 2 Ya hite, kele kele pana'magi kaba bo'animofihi ka'a kehelite enali hiti lali hiti moneko mono'i keheli amuya mololoto mino bati huto gonamu tamu'a minalune lite kehelite enali kumu kehelinogo melimino. Enali kele kele pana'magi Hu'mamofi kumu yabe lite enemehi epilete lili'na amuya melete minalabe. To hena'mube? Enali kaba bo'animagi lili'na'aniloti nose'na mana'a lilata nehanamagi Hu'mamofihi naga'i nehana bona'i yabe. To enemehi epilata bona'i nehana yabe. Ya'mu lama'naka lite bati hite agoya hi epalalana yamofihi mone sipi foya lite minalana'mu yabe.

Faga faga mono ka enelepise bona'magi kumu yabe

Kaiya ya'ma kaga lu enelepi enelepi huto lu epito minalane. 3 Bona'i mone'amagi enali ka lamana'a keheli he'mite fato mono ka lilana to Sipi Boti Yesu Kilisito ai ka'a keheli he'mite mono kamofihi kapo'agu kagalo enemegesa hi emilana bona'i enali kumu ya'ma luto lilugi, 4 enali'ani enegekesa kehelite enugufa'ani lelite tite kag'a mone keheli bati mehabe. Kaga molo emi emi hite liba liba hite minelata nehana ya nasanauba enumu filigo minete kenasabo bite to siko bako hite enemehi ito ago hite luba sabo hite li sibina sabana hilata nehabe. To fa'mene'mu enemegeka lite faga hiti lilata nehabe. 5 Ya hilete ya'ma kehelite keheli sibi hite minelata nehana bona'i yamofihi enali komopa'ani enegekesa hekini lo'ehigo sibi nehite ka lamana'a he'mite mono kauba yogo fe'nohi li huto hilibe lite kehelilata nehabe.

6 Yogo fe'nohi lugufalo li ho kalune luto yanamofi kumu topa mehose amanapa huto minoto kehelito minenogoti mono ka lamana'auba lalitoga legeya'a heniloto minalibe. 7 Lali ma luto keheli'ohune. Lali metoga itotigi lekete'ahana kana'alo ya'ma ana'ina fe'nohi mone ito meo'ohuna. To minoto fililuta kana'alo metogati ya'ma lugufa yapako fa'mene biluta'mu yabe. 8 Yana'mu gukete hiti to nose'na luna lana'mu ni'inogomo yamofihi fa'mene hetofa huto anasi minalune. 9 Yogo fe'nohi babu lutobe enumu fililata bona'i enali Satau enimi'i melenogo bite Satahi kelefugu halana'mu. Ya nehite fa'menena enele'mo lolo hinogo negi nelana nasana fato fato nasana'mu enumu filinogo yanalo nuki faki nehite logo hepalugu limite naga'i lolo hilune'mu habe. 10 Yogo fe'no kumu topa holata nohutamofihi komopa'aguti fato fatomofihi foipana'a huto hilibe. Bona'i luga'amagi yogo fe'no kumu lilune lite yata'a mono kapogu bilatana he'mite fato kapogu i pebisa hete tili tele hi'ahana. Ya nehago enalitoga eniginaga fise'na silaga'i huto hu'ehina yabe.

Lemehi emilata nohutamofihi amuya moloto foya'a lilune

11 Timotio, Hu'mamofihi foyalo pana'ase. Kai ana'ina laga mehina'a kemegesa hu emibo. Ya nohuto ya'ma mino lamana huto bati huto minoto lito huse'namofihi mono ka'a hiti minolatana, keheli ule'ale hulatana, komopaka epilata nasana, kalana'i mele ketalana nasana huto nohinogo amanapa huto minose'na enele'mo baba ise'na ya'ma molo emito minalube luto amuya malalatagihe. 12 Ya nohutoka kemehi emise'namofi kumu keheli ule'ale huto minoto, to mino kosaba'namofihi kapogu hololu luto bilata yamofihi mina'a lilane. Lelito buto amuya mololata yamofihi li pili koto lilane. To kaika ya hilube luto silaga bona'magihi enogobisalo mono ka ya suhi nohube luto lu molo'ehitogo Hu'mau ana huto kemehi emise'na ya suhi huto minalane luto elesa molo kimi'ehinamo ni'ibe. 13 Ana'ina li huto hu'ehina bo Hu'mamofihi gobisalo to gamani bo, Ponitiasi Pailatihi maha'aga ai'a hetofa hapa'amu lu huto hu'ehina bo, Yesu Kilisitohi gobisalo ya'ma luto lu moloto nolube. 14 Kai ya'ma Hu'mau lu molo'ehina ka keheli'ahata yamofihi mege'i molobo luto nolube. Ya hulotoka komopaka gulu gulu linogo foipana meminenogo minoto nobitogo Sipi Boti Yesu Kilisitou nehetilina kana'a huto hilina'mu yabe. 15 Ai kana'a huto hilina'a leba talinamo ni'ibe. Hu'mau lulenogo huto hu lamana hilina'mu yabe. Hu'mau ai'a mino kikipa hoto nominanamofihi laga'namofihi kaba bo'a moneko'isi nohibe. Ai hetofa enikibina gihiti bomagihi sipi bo'ani aito kaba bomagihi sipi bo'ani moneko'i nohibe. 16 Ai'asigo filise'na'a meni'ibe. Ai'a fana mehena'alo minoto lito nohina ya'ma lali fa'mene buto bu nehetise'a meni'ibe. Bo moneko'uba ai gufa'a bu mego'ehinamo ni'inagi to bo moneko'uba be megalube'mu hibe. Keke boke ka lu emilata nohuta amuya to usisi kito minolata nohuta amuya aitoga mineno. Ma'naka.

17 Kai bona'i mone'amagi ma metoga nasana yogo fe'nohi babu luto silaga'i li nupa nupa nehana ya luto lu moloto lu epibo. Enugufa'ani lelite tite enemeha'ani sipalo memalalabe. Guna melelata nasana'mu kehelinogo lamana'a lolo mehino. Ya nasanaga bite i mekeleno. Hu'mau ai'a ya'ma lenumu hinogo nete melete laga'amu kehelilabe luto fitu fo limilata nohina bo aitoga ya'ma buto i ke'malune, luto lu epibo. 18 Kai ma luto lu moloto lu epibo. Ana'ina lamana'amuko kehelite lite minalabe. Foya li lamana'a melete lolo hilana yanauba legeya'a lamana'a lolo hilibe. Fato bona'i enehe'mete lisipa mebise minete to ana'ina'ani guna melete li miyalo malo hite lite minalabe luto lu epibo. 19 Ya nehite ya'ma mono ka legeya'a li huto hilanauba lufusa'ani ule'ale huto lolo hulenogo aliha'a mino lito buto minalinamo ni'ibe. Ya nohigo enali enemehi lamana'amofihi legeya'a lite mino kosaba huse'na lilana'mu yabe.

20 Oho, Timotio. Ya'ma amuya nasana Hu'mau ya'ma kimi'ehina'a kaba hu bati huto lito minobo. To fa'mene kaga futu'a ya'ma bona'i luga'amagi lite nehite lali mono ka pelesa ilete ma lite lilata nehabe. Ananamofihi hapa'a akeheli su ho'ohune lite faga hiti enegekesa keheli sibina hilata nehabe. Ya'ma enali kagamofihi li he'mi'ohubo. 21 Yana'mu bona'i mone'amagi ya'ma keheli fe lise'na kagalo bite i hepilete lali mono ka bu go fulu tiloto akeheli su ho'ohune nelana enali lusi mono ka ahe'mite lamana'amofihi kapogu sa sa hite mebilata nehana yabe.

Hu'mamofihi lehe'mose'a yamofihi lenalitoga mino moloto mineno.